Archive | Ochobre, 2009

IX ensin asturianismu:un muertu en vida

31 Och

Torna a la actualidá la conveniencia o non de puxar pola propuesta entamada por Valledor de facer una fuercia asturiana,asturianista,verde y d’esquierdes a partir del seutor asturianista d’IX,el Bloque,UNA etc

A día de güei nun ye más qu’una propuesta y nada más.Valledor nun va ariesgase a facer nada ensin el sofitu d’eses otres fuercies coles que quieren cuntar,nin estes fuercies paecen mui pol llabor d’averase a valledor.

Pero vamos facer un analís de lo que pasaría con IX si esi nuevu partíu surdiere.

Pa entamar,con Valledor colaría el Bloque por asturies,Los verdes y el seutor asturianista de la coalición,dexando a esta ensin más d’un terciu de los potenciales votantes colos qu’agora cunten.N’otres pallabres:Izquierda Xunida quedaría col votu tradicional del Partíu comunista como únicu bastión pa siguir esistiendo,amás de quedar organizativamente falando nuna situación perdificil.

Perder a esos seutores pa IX sedría perder el pocu dinamismu col qu’agora mesmo cunten en favor d’una nueva y ilusionante fuercia qu’atapecería a esti partíu.

Sedría dexar solos nun barcu naufragante a los responsables de la perpetuidá del réxime “socialista”,ensin la mázcara cola que se cubríen hasta agora.

Tamién sedría finar,en gran midida,cola esquizofrenia a la que nos tien avezaos Izquierda Xunida,criticando a diestru y siniestru les midies qu’ellos mesmo sofiten como miembros del gobiernu .

Una vegada desmazcaritaos y reducíos a una versión del PCA qu’asume y collabora col sistema,anque esti seya tolo contrario a lo que diz la so ideoloxía,la esistencia d’IX nun tendría sentíu.Evidentemente siguiríen esistiendo,porque pa una organización estatal sedría un desastre nun cuntar con una federación n’Asturies,pero nun sedría más qu’un muertu en vida,un depositariu de votos de la esquierda non asturianista que bien podía votar a la FSA.

Tuvieren la so oportunidá,l’asturianismu d’esquierdes al traviés de bona parte de los sos votantes sofitarenlos y ellos respondieren vendiéndose por puestinos y perres al gobiernu arecista.

Nun van tener más oportunidaes,y ye custión de tiempu qu’IX españe.Ye imposible que la xente que de verdá puxa por esi proyeutu del que fala valledor quede n’IX ensin facer nada polos sieglos de los sieglos.

N’IX de xuru que danse cuenta de que si esi proyeutu tira p’alantre sedria’l so fin,pero ente escoyer caltener a esos seutores camudando’l pensamientu dominante na organizacion o siguir chupando del bote anque esto seya morrer politicamente,ye evidente lo que van escoyer…

Advertisements

Xornaes d’instalación d’Ubuntu n’asturianu

30 Och

Ellí tará la xente de softastur desendolcando otra vegada más esi gran y desinteresáu trabayu que faen.

Méritu

23 Och

Eso ye lo que me paez que tien el secretariu de la federación norte del partíu Ciudadanos,Pablo Yáñez.

¿Por qué digo eso? Cenciello:nun ye nada fácil dicir tantes mentires nuna sola entrevista.

Xulgá-y vosotros mesmos.

http://www.asturnews.com/index2008.php?idn=8857#

Evidentemente lo que diga esi home nun tien nengún interés nin importancia,ye otru babayu más soltando babayaes ensin prebes escontra la nuesa llingua.Sí hai una cosa que nun pueo almitir,y ye que lo diga el “representante de la federación norte de Ciudadanos”.

¿Nun tienen representantes n’asturies? Votos yá sabíemos que nun tienen,pero si nun tienen nin una estructura organizativa n’asturies que-yos permita falar en nome del so partíu,nun deberíen facelo,y yá que lo faen,polo menos qu’argumenten les sos pallabres,dalgo a lo que nun tan avezaos en partíos como esi o como UPYD,que nun ye la primera vegada que dicen tonteríes d’esi tipu sobre la nuesa llingua,y nun sedrá la última.

Lo que tenemos que siguir faciendo ye atacar a esa minoría poderosa qu’ataca a la nuesa cultura con argumentos,movilización y aición política.

Güei ye’l día

22 Och

Güei ye día d’escaecer lluches y engarradielles que faen más mal que bien al nuesu movimientu.

Güei ye día de xuntanza,d’amosar toos xuntos el nuesu refugu a los premios principiegos y tolo que representen.

Ye día de glayar toos xuntos pola llibertá del nuesu país,por esi vieyu suañu de República socialista asturiana pol que los nuesos güelos llucharon con toles consecuencies.

Republicanismu asturianu,nacional y d’esquierdes.Güei ye’l día d’amosar que nun hai pilancos que puean con nós,y que siguimos alitando pesie a que nos dean por muertos;en munchos casos nunca nun nos dieren por vivos…

Güei ye día d’escaecer vieyos sectarismos y amosar que na xuntanza de fuercies ta’l camín.

Güei ye’l día d’entrugar:Príncipes d’asturies,¿QUIÉN LO DECIDIÓ?

22 D’OCHOBRE. PRÍNCIPES D’ASTURIES, ¿QUIÉN LO DECIDIÓ?

11 Och

L’Ensame República Asturiana convoca nuevamente esti añu una manifestación escontra los Premios Príncipe y pola República Asturiana, baxo’l llema “Premios Príncipe: ¿Quién lo decidió?”

La manifestación partirá de la Estación del norte d’Uviéu el 22 d’ochobre a les 22:00 hores.

Manifiestu República Asturiana:

Les persones y coleutivos que roblamos esti ‘Manifiestu’ queremos espresar lo que vien de siguío:

1) Asturies vive nuna situación antidemocrática dafechu, na que los valores republicanos y los derechos sociales y nacionales vienen siendo negaos y xabazmente reprimíos per parte del estáu español, formáu en Reinu.

2) Una de les espresiones sociales más significatives d’esti fechu ye la denomación institucional d’Asturies como “Principado”, figura política impuesta a esti Pueblu qu’afala’l vasallaxe y el servilismu a una institución arcaica, elitista y antidemocrática cola qu’Asturies y les asturianes y asturianos nada ganamos nin tenemos nada que ver.

3) Oponémonos a cualquier tipu de réxime monárquicu, por ser ésti’l paradigma de la desigualdá social y la falta de derechos con impunidá llegal. Tampoco podemos escaecer que la designación del monarca español foi fecha durante’l franquismu, siendo ésti designáu y coronáu a deu directamente pol propiu dictador, ensin qu’entá viéremos enfotu dalu nesta institución predemocrática por pedir perdón tres cuarenta años de fascismu xenocida col beneplácitu del sistema llegal ‘constitucional’ actual.

4) Denunciamos el compromisu col capitalismu xabaz, asesín de tolos pueblos del mundu, que remanez de la monarquía española, siendo ésta garante de la defensa de les clases privilexaes y de la desigualdá económica, social y de derechos. Refugamos, tamién, les actitúes machistes, homófobes, represores y censores que surden dende la monarquía española, qu’afiten, una vegada más, el so orixe feudal y arcaicu, comportamientos mui estremaos a los que defendemos nosotres y nosotros.

5) Consideramos una humildación a Asturies la cellebración de los ‘Premios Príncipe de Asturias’, considerándolos una coartada pa ‘llavar la cara’ internacionalmente a la monarquía, faciéndola pasar por institución moderna y que respeta la cultura, visión mui alloñada d’una, muncho más cercana a la realidá, de ‘familia de vividores a sueldu de toes y toos’ que conocemos perbién y manipulando al traviés de los medios españolistes, al tiempu, la imaxe de la sociedá asturiana. Poro, nun podemos dexar de pidir la crítica pa los galardonaos por estos ‘premios de pandereta’, que faen el xuegu cómpliz a la monarquía española, nin dexar d’ablucar y protestar, tampoco, polos costes de les fartures ‘reales’ a cargu de los nuestros impuestos –nestos tiempos de crisis– , asina como de la situación d’estáu y ocupación militar y policial ostentoria que nel nuestru país se xenera con cualaquier ‘visita’ de los miembros d’esa familia ‘real’.

6) Queremos afitar dende agora mesmo la necesidá d’articular y crear un movimientu republicanu asturianu que lluche pola lliberación d’esti país y refugue cualquier tipu d’opresión nacional y social, como la que constitúi la monarquía española y cualquier réxime monárquicu. Asina, namás entendemos un cambiu de modelu de país pa construyir una República Socialista asturiana onde los valores republicanos d’igualdá, llibertá, accesu a la cultura y llaicismu seyan los finxos que caltengan la nuestra llucha por una Asturies xusta y un mundu de pueblos llibres.


¡¡PUXA LA REPÚBLICA ASTURIANA, SOCIALISTA Y SOBERANA!!

Homoxeneidá y xuntanza

11 Och

“Dexéme arrastrar pol cólera qu’apodérase de min cuando pienso nos innobles y criminales medios que s’empleguen pa conservar les naciones nuna esclavitú eterna,col envís de poder esfarrapales meyor” M.Bakunin

En tolos partíos esisten diverses corrientes y seutores internos.Nunos partíos eses corrientes puen ser por diverses tendencies d’esquierdes,n’otros pola esistencia de seutores críticos colos que caltienen el poder nel partíu,otros puen ser de calter asturianista dientro d’un partíu de calter españolista etc

De mayor o menor tamañu,pero en práuticamente en tolos partíos esiste más d’un seutor,sobre too nos partíos “poco avezaos” a la dixebra organizativa.

Esi casu nun ye’l de los partíos del nacionalismu asturianu,mui daos a dixebráse y engarrase a la mínima.

Estes dixebres faen que,por exemplu,un partíu nel que habia xente favoratible a la xuntanza y xente que non conviértase en dos partíos,o xente que taba disconforme cola xente que lleva’l partíu colen pa facer otru o entrar n’otra organización.

Les consecuencies d’este y otres aiciones de dixebra son la perda de diversidá ideolóxica dientro de los partíos,faciendo que tolos nacionalistes favoratibles a cierta cosa militen toos nun partíu,los favoratibles a otra n’otru partíu,y asina hasta facer partíos homoxéneos,nos que nun esistan voces crítiques nos temes ideolóxicos principales de cada partíu.

Quiciabes eso nun seya tovía asina,y nes fuercies nacionalistes asturianos tovía tengamos diverses voces dientro de los partíos,pero ensin un cambéu de mentalidá,la cual ta avezada a la dixebra,diremos camín d’esa situación.

Esa homoxeneidá na militancia sedría mui perxudicial pal nuesu movimientu,l’alderique siempres ye positivu y aida a facer meyores estratexes,propuestes etc

Toos compartimos el mesmu enfotu,los mesmos oxetivos,caún colos matices propios de la so ideoloxía,pero salvables nel marcu d’una mentalidá nacional que nos permita facer frenti común.

El problema ye’l de siempres:nes cúpules de los partíos nacionaliegos nun interesa aportar a esa mentalidá nacional.

¿Por qué? Ellos sabrán…

Puxa la revolución d’ochobre’l 34

6 Och
bnm